دشمنِ احمد پہ شدت کیجئے
ملحدوں کی کیا مروت کیجئے
ذکر اُن کا چھیڑیئے ہر بات میں
چھیڑنا شیطاں کا عادت کیجئے
مثلِ فارس زلزلے ہوں نجد میں
ذکرِ آیاتِ ولادت کیجئے
غیظ میں جل جائیں بے دینوں کے دل
"یارسول اللہ" کی کثرت کیجئے
کیجئے چرچا اُنہیں کا صبح و شام
جانِ کافر پر قیامت کیجئے
آپ درگاہِ خدا میں ہیں وجیہ
ہاں شفاعت بالوجاہت کیجئے
حق تمہیں فرماچکا اب تو حبیب
اب شفاعت بالمحبت کیجئے
اِذن کب کا مل چکا اب تو حضور
ہم غریبوں کی شفاعت کیجئے
ملحدوں کا شک نکل جائے حضور
جانبِ مَہ پھر اشارت کیجئے
شرک ٹھہرے جس میں تعظیمِ حبیب
اس برے مذہب پہ لعنت کیجئے
ظالمو ! محبوب کا حق تھا یہی
عشق کے بدلے عداوت کیجئے
والضحےٰ حجرات الم نشرح سے پھر
مومنو ! اتمامِ حجت کیجئے
بیٹھتے اٹھتے حضورِ پاک سے
التجا و استعانت کیجئے
یارسول اللہ دہائی آپ کی
کوشمالِ اہلِ بدعت کیجئے
غوثِ اعظم آپ سے فریاد ہے
زندہ پھر یہ پاک ملّت کیجئے
یاخدا تجھ تک ہے سب کا منتہیٰ
اولیا کو حکمِ نصرت کیجئے
میرے آقا حضرتِ اچھے میاں
ہو رضا اچھا وہ صورت کیجئے
اعلیٰ حضرت الشاہ امام احمد رضا خان فاضلِ بریلوی رحمۃاللہ علیہ
No comments:
Post a Comment