حضرت ابو جندل رضی اللہ عنہ کا پاسِ عہد اور جذبہ حب رسول ﷺ

حضرت ابو جندل رضی اللہ عنہ کا پاسِ عہد اور جذبہ حب رسول ﷺ

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

حضرت ابو جندل رضی اللہ عنہ عشقِ رسول کی چلتی پھرتی تصویر تھے۔ اسلام کے دامنِ رحمت سے وابستہ ہوئے اور اپنا سب کچھ حضور صلی اللہ علیہ وآلہ وسلم کے قدموں پر نثار کر دینے کا عہد کر لیا۔ اس کی پاداش میں ان پر مصائب کے پہاڑ ٹوٹ پڑے، کفار و مشرکین مکہ نے اس جاں نثارِ پیغمبر صلی اللہ علیہ وآلہ وسلم کو زنجیروں میں جکڑ دیا لیکن ان کے پائے استقلال میں لغزش نہ آئی۔ صلح حدیبیہ کی دستاویز حیطۂ تحریر میں لائی جا چکی تھی کہ حضرت ابو جندل رضی اللہ عنہ کفار و مشرکین کی قید سے بھاگ کر پناہ کے لئے حضور صلی اللہ علیہ وآلہ وسلم کی خدمتِ اقدس میں حاضر ہو گئے۔ ابو جندل رضی اللہ عنہ سے تمام تر ہمدردی کے باوجود آپ صلی اللہ علیہ وآلہ وسلم کو معاہدے کی خلاف ورزی ہرگز گوارا نہ تھی۔ آپ صلی اللہ علیہ وآلہ وسلم اور آپ صلی اللہ علیہ وآلہ وسلم کے صحابہ نے دل پر پتھر رکھ کر ابوجندل رضی اللہ عنہ کی واپسی کی تجویز سے اتفاق کیا۔ آقائے دوجہاں صلی اللہ علیہ وآلہ وسلم نے ابوجندل رضی اللہ عنہ کو مخاطب کیا :

يا أبا جندل! قد تم الصلح بيننا و بين القوم، فاصبر حتي يجعل اﷲ لک فرجا و مخرجاً.

اے ابو جندل! ہمارے اور اس قوم کے درمیان صلح مکمل ہو گئی ہے، اس لئے تم صبر کرو، یہاں تک کہ اللہ تعالیٰ تمہارے لئے کشائش اور نکلنے کی راہ پیدا کر دے۔

ابن سعد، الطبقات الکبري، 2 : 297

بخاري، الصحيح، 2 : 967، کتاب الشروط، رقم : 32564

بيهقي، السنن الکبري، 9 : 4227

طبراني، المعجم الکبير، 20 : 16، رقم : 515

طبري، تاريخ الامم والملوک، 2 : 6123

ابن هشام، السيرة النبويه، 4 : 287

ابوجندل رضی اللہ عنہ نے آقا صلی اللہ علیہ وآلہ وسلم کے فرمان کی تعمیل کر کے اطاعت و اتباع کی ایک نئی داستان قلمبند کی اور اپنے عمل سے ایفائے عہد کے چراغ کو بجھنے نہ دیا۔