اصطلاحات احادیث کا مختصر بیان

اصطلاحات احادیث کا مختصر بیان

نبی کریم صلی اللہ تعالیٰ علیہ و آلہ وسلم یا صحابہ ، تابعین رضی اللہ تعالیٰ عنہم نے جو کچھ فرمایا اور جو کچھ کیا یا کسی کو کچھ کہتے سنا یا کچھ کرتے دیکھا اوراس پر منع و انکار نہیں فرمایا بلکہ خاموش رہے تو ان سب چیزوں کو محدثین کی اصطلاح میں ’’حدیث ‘‘ کہا جاتاہے ۔

اس اعتبار سے حدیث کی تین قسمیں ہوگئیں

(1) حدیث ِمَرْفُوع ۔ (2) حدیث ِمَوْقُوف ۔ (3) حدیث ِمَقْطوع

حدیثِ مَرْفُوع : وہ حدیث جو حضور صلی اللہ تعالیٰ علیہ وآلہ وسلم تک پہنچ جائے یعنی اس حدیث میں یہ ذکر کیا گیاہو کہ حضور صلی اللہ تعالیٰ علیہ وآلہ وسلم نے ایسا فرمایا، یا حضور نے ایسا کیا، یا حضور کے سامنے لوگوں نے ایسا کہا یا ایسا کیا اس کو ’’حدیث ِ مرفوع‘‘ کہتے ہیں ۔

حدیث مَوْقُوف : وہ حدیث جو صحابی تک پہنچے یعنی اس حدیث میں یہ مذکور ہو کہ مثلاً ابن عباس رضی اللہ تعالیٰ عنہما نے کہا، یا ابن عمر رضی اللہ تعالیٰ عنہ نے کیا، یا ابن مسعود رضی اللہ تعالیٰ عنہ نے ایسا دیکھا یا سنا تو اس کو ’’حدیث موقوف‘‘ کہتے ہیں ۔

حدیث مَقْطوع : وہ حدیث جو تابعی تک پہنچے یعنی اس حدیث میں یہ بیان کیا گیا ہو کہ مثلاً سعید بن جُبَیْر رضی اللہ تعالیٰ عنہ نے ایسا کہا یا ایسا کیا، یا عِکرمہ رضی اللہ تعالیٰ عنہ نے لوگوں کویہ کرتے دیکھا یا یہ کہتے سنا تو اس کو ’’حدیث ِ مَقْطوع‘‘ کہتے ہیں ۔

رِوایت: حدیث نقل کرنا ، حدیث بیان کرنا ۔

راوی : حدیث نقل کرنے والا، حدیث کوبیان کرنے والا ۔

سند ِ حدیث :حدیث کو نقل کرنے والے راویوں کا سلسلہ جیسے عَنِ ابْنِ شِھَابٍ عَنْ عُبَیْدِ اللّٰہِ بْنِ عَبْدِ اللّٰہِ عَنِ ابْنِ عَبَّاسٍ عَنِ النَّبِیِّ صَلَّی اللّٰہُ تَعَالٰی عَلَیْہِ وَاٰلِہ وَسَلَّمَ متنِ حدیث: جہاں سند ختم ہوجائے اسکے بعد کے الفاظ کو ’’متنِ حدیث‘‘ کہا جاتاہے ۔

صَحابی : جس کو بحالت ِایمان حضور صلی اللہ تعالیٰ علیہ وآلہ وسلم کی صحبت نصیب ہوئی اور ایمان ہی پر اس کا خاتمہ ہوا ۔

تابعی : جس نے بحالت ِایمان کسی صحابی سے ملاقات کی اورایمان ہی پراس کا خاتمہ ہوا۔

اس اعتبار سے کہ اصل حدیث راوی تک کس طرح پہنچی حدیث کی چار قسمیں ہیں

(1) حدیث ِمتواتر ۔ (2) حدیث ِمشہور ۔ (3) حدیث ِعزیز ۔ (4) حدیث ِغریب

حدیث متواتر : وہ حدیث ہے جس کے روایت کرنے والے ہر زمانے میں اس قدر کثیر لوگ ہوں کہ ان کا جھوٹ پر متفق ہوجانا عادتاً محال ہو ۔

حدیث ِمشہور : وہ حدیث ہے جس کے راوی ہر دور میں دوسے زیادہ رہے ہوں اس کو ’’حدیث مستفیض ‘‘ بھی کہتے ہیں ۔

حدیث ِعزیز : وہ حدیث ہے جس کو ہر دور میں دو راوی روایت کرتے رہے ہوں اور پوری سند میں کہیں بھی دوراوی سے کم نہ ہوں ۔

حدیث ِغریب : وہ حدیث ہے جس کے سلسلۂ سند میں کہیں صرف ایک ہی راوی رہ گیا ہو ۔

وَضَّاعُ الحدیث : جھوٹی حدیثیں گھڑلینے والا ، ایسا آدمی سخت گناہگار اور جہنمی ہے ۔

حدیث مَوضُوع : جھوٹے راوی کی بیان کی ہوئی حدیث جس کا حدیث ِ رسول ہونا ثابت نہ ہو یہ ’’حدیث موضوع‘‘ ہے جو قطعاً غیر معتبر ہے ۔

محدثین : علومِ حدیث میں مشغول ہونے والے حضرات ’’محدثین ‘‘ کہلاتے ہیں ۔

مُؤرخین : گذرے ہوئے زمانے کی تَواریخ اور حالات بیان کرنے والے ’’مؤرخین‘‘ یا ’’ اخباری ‘‘ کے لقب سے یاد کیے جاتے ہیں ۔

صحاحِ ستّہ

(1) بخاری شریف ۔ (2) مسلم شریف ۔ (3) ترمذی شریف ۔ (4) بوداؤد شریف ۔ (5) سنن نسائی شریف ۔ (6) سنن ابن ماجہ شریف ۔ حدیث کی یہ چھ (6) مشہور کتابیں ’’صحاحِ ستہ ‘‘ کہلاتی ہیں ۔ (طالب دعا ڈاکٹر فیض احمد چشتی)