میرے پیارے نبی ﷺ کے لب و دندان مبارک (Lips & Teethes) ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ترتیب و پیشکش : ۔ ڈاکٹر فیض احمد چشتی لاھور پاکستان ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میرے پیارے نبی ﷺ کے لب و دندان مبارک (Lips & Teethes)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ترتیب و پیشکش : ۔ ڈاکٹر فیض احمد چشتی لاھور پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پتلی پتلی گل قدس کی پتیاں
اُن لبوں کی نزاکت پہ لاکھوں سلام
جنکے گچھے سے لچھے جھڑیں نورکے
اُن ستاروں کی نزہت پہ لاکھوں سلام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حضور صلی اللہ علیہ وسلم کے لب مبارک نہایت خوبصورت اور سرخی مائل تھے۔ دندان مبارک کشادہ، روشن و تاباں تھے۔ جب آپ کلام فرماتےتھے تو دندان پیشین میں سے نور نکلتا دیکھائی دیتا تھا، اور جب آپ تبسم فرماتے تو دیواریں روشن ہو جاتی اور آپ کو کبھی جمائی نہ آئی باوجود اس کے کہ آپ کے دندان مبارک نہایت چمکیلے اور صاب تھے پھر بھی آپ ان کی صفائی کا بہت اہتمام فرماتے، احادیث میں آتا ہے کہ آپ کسی نماز کے لیے تشریف نہ لے جاتے تا وقتیکہ مسواک نہ فرمالیتے اور جب بھی کہیں باہر سے گھر تشریف لاتے تو سب سے پہلا کام مسواک کرناہوتا۔ یہ سب کچھ امت کی تعلیم کے لیے تھا چنانچہ فرمایا مسواک ہمیشہ کیا کرو کہ وہ سبب ہے منہ کی صفائی اور رب تعالی کی رضا کا ، نیز فرمایا دو رکعتیں جو مسواک کر کے پڑھی جائیں بے مسواک کی ستر رکعتوں سے افضل ہیں۔
حضرت ابن عباس رضي اللہ عنہ فرماتے ہیں۔
کہ حضور صلی اللہ علیہ وسلم کے سامنے کے دندان مبارک کشادہ تھے۔ جب آپ کلام فرماتے تو آپ کے دانتوں سے نور نکلتا تھا۔دارمی۔ مشکوۃ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حضور رحمتِ عالم صلی اللہ علیہ وآلہ وسلم کی مبارک آواز دلآویزی اور حلاوت کی چاشنی لئے ہوئے حسنِ صوت کا کامل نمونہ تھی۔ لہجہ انتہائی دلکش، باوقار اور بارعب تھا۔ آپ صلی اللہ علیہ وآلہ وسلم ٹھہر ٹھہر کر یوں گفتگو فرماتے کہ بات دل میں اتر جاتی اور مخاطب دوبارہ سننے کی خواہش کرتا۔
1۔ حضرت انس رضی اللہ عنہ سے روایت ہے :
ما بعث اﷲ نبياً قط إلا بعثه حسن الوجه، حسن الصوت، حتي بعث نبيکم صلي الله عليه وآله وسلم ، فبعثه حسن الوجه حسن الصوت.
’’اللہ تبارک و تعالیٰ نے جس بھی نبی کو مبعوث فرمایا خوبصورت چہرہ اور خوبصورت آواز دے کر مبعوث فرمایا حتیٰ کہ تمہارے نبی مکرم صلی اللہ علیہ وآلہ وسلم کو مبعوث فرمایا تو انہیں بھی خوبصورت چہرے اور خوبصورت آواز کے ساتھ مبعوث فرمایا۔‘‘
1. ابن سعد، الطبقات الکبريٰ، 1 : 376
2. ترمذي، الشمائل المحمديه، 1 : 261، رقم : 321
3. ابن کثير، البديه والنهايه، 6 : 286
4. سيوطي، الخصائص الکبريٰ، 1 : 124
5. حلبي، السيرة الحلبيه، 3 : 434
2۔ حضرت براء بن عازب رضی اللہ عنہ نمازِ عشا میں حضور نبی اکرم صلی اللہ علیہ وآلہ وسلم کی تلاوت کے حوالے سے بیان فرماتے ہیں :
سمعتُ النبي صلي الله عليه وآله وسلم يقرأ ﴿وَالتِّيْنِ وَ الزَّيْتُوْنِ﴾ في العشاء، و ما سمعتُ أحداً أحسن صوتاً منه أو قراءةً.
’’میں نے حضور صلی اللہ علیہ وآلہ وسلم کو نمازِ عشاء میں سورۃ التین کی تلاوت فرماتے ہوئے سنا، اور میں نے کسی کو آپ صلی اللہ علیہ وآلہ وسلم سے زیادہ خوش الحان اور اچھی قرآۃ والا نہیں پایا۔‘‘
1. بخاري، الصحيح، 1 : 266، کتاب الاذان، رقم : 735
2. مسلم، الصحيح، 1 : 339، کتاب الصلوٰة، رقم : 464
3. ابن ماجه، السنن، 1 : 273، کتاب إقامة الصلوة والسنة فيها، رقم : 835
4. احمد بن حنبل، مسند، 4 : 302
5. ابو عوانه، مسند، 1 : 477، رقم : 1771
6. بيهقي، السنن الکبريٰ، 2 : 194، رقم : 2888
3۔ سفرِ ہجرت میں حضور صلی اللہ علیہ وآلہ وسلم نے اُمِ معبد رضی اﷲ عنہا کے ہاں قیام فرمایا۔ آپ صلی اللہ علیہ وآلہ وسلم کی آواز کے بارے میں اُمِ معبد رضی اﷲ عنہا کا کہنا ہے :
في صوته صلي الله عليه وآله وسلم صَحَلٌ.
’’آپ صلی اللہ علیہ وآلہ وسلم کی آواز میں دبدبہ تھا۔‘‘
1. طبراني، المعجم الکبير، 4 : 50، رقم : 3605
2. حاکم، المستدرک، 3 : 10، رقم : 4274
3. ابن سعد، الطبقات الکبريٰ، 1 : 231
4. طبري، الرياض النضره، 1 : 471
5. زرقاني، شرح المواهب اللدنيه، 5 : 446
4۔ حضور صلی اللہ علیہ وآلہ وسلم کی آواز نغمگی اور حسنِ صوت سے کمال درجہ مزین تھی۔ حضرت جبیر بن مطعم رضی اللہ عنہ بیان کرتے ہیں :
کان رسول اﷲ صلي الله عليه وآله وسلم حسن النغمة.
’’حضور صلی اللہ علیہ وآلہ وسلم کا لب و لہجہ نہایت حسین تھا۔‘‘
1. صالحي، سبل الهديٰ والرشاد، 2 : 91
2. زرقاني، شرح المواهب، 5 : 446
5۔ مبداء فیض نے حضور سید المرسلین صلی اللہ علیہ وآلہ وسلم کو اس منفرد وصفِ جمیل سے نواز رکھا تھا کہ آپ صلی اللہ علیہ وآلہ وسلم کی آواز دور دور تک پہنچ جاتی۔ حضرت براء بن عازب رضی اللہ عنہ فرماتے ہیں :
خطبنا رسول اﷲ صلي الله عليه وآله وسلم حتي أسمع العواتق في خدورهن.
’’حضور رحمتِ عالم صلی اللہ علیہ وآلہ وسلم نے ہمیں خطبہ ارشاد فرمایا تو پردہ نشین خواتین کو بھی آپ صلی اللہ علیہ وآلہ وسلم نے پردوں کے اندر (یہ خطبہ) سنایا۔‘‘
1. سيوطي، الخصائص الکبريٰ، 1 : 113
2. طبراني، المعجم الاوسط، 4 : 125، رقم : 3778
3. طبراني، المعجم الکبير، 11 : 186، رقم : 11444
4. هيثمي، مجمع الزوائد، 8 : 94
5. نبهاني، الانوار المحمديه : 207
6۔ حضرت عائشہ صدیقہ رضی اللّٰہ عنہا سے مروی ہے کہ حضور صلی اللہ علیہ وآلہ وسلم جمعہ کے دن منبر پر تشریف فرماہوئے اور لوگوں سے بیٹھنے کو کہا :
فسمعه عبد اﷲ بن رواحة و هو في بني غنم فجلس في مکانه.
’’اس وقت حضرت عبداللہ بن رواحہ رضی اللہ عنہ محلہ بنی غنم میں تھے، انہوں نے آپ صلی اللہ علیہ وآلہ وسلم کی آواز مبارک سنی اور وہیں بیٹھ گئے۔‘‘
1. نبهاني، الانوار المحمديه، 207
2. سيوطي، الخصائص الکبريٰ، 1 : 113
3. مقريزي، امتاع الاسماع، 2 : 160
7۔ خطبۂ حجۃ الوداع کے موقع پر صحابہ کرام رضی اللہ عنھم کی تعداد سوا لاکھ کے قریب تھی، اس اجتماعِ عظیم سے آپ صلی اللہ علیہ وآلہ وسلم نے خطاب فرمایا تو اِجتماع میں شریک ہر شخص نے خطبہ سنا۔
حضرت عبدالرحمن بن معاذ تمیمی رضی اللہ عنہ فرماتے ہیں :
کنا نسمع ما يقول و نحن في منازلنا، فطفق يعلمهم مناسکهم.
’’ہم اپنی اپنی جگہ پر حضور صلی اللہ علیہ وآلہ وسلم کا خطبہ سن رہے تھے جس میں حضور صلی اللہ علیہ وآلہ وسلم لوگوں کو مناسکِ حج کی تعلیم دے رہے تھے۔‘‘
1. ابوداؤد، السنن، 2 : 198، کتاب الحج، رقم : 1957
2. نسائي، السنن، 5 : 249، کتاب مناسک الحج، رقم : 2996
3. بيهقي، سنن الکبريٰ، 5 : 138، رقم : 9390
4. مقريزي، امتاع الاسماع، 2 : 160