اعلیٰ حضرت امام احمد رضا خان بریلوی رحمۃ اللہ علیہ اور مذمتِ انگریز

اعلیٰ حضرت امام احمد رضا خان بریلوی رحمۃ اللہ علیہ اور مذمتِ انگریز

انگریز تاجر کی حیثیت سے آئے ۔ اندرونی کمزوریوں سے فائدہ اٹھایا۔ ہندوستان پر قبضہ جمایا ۔ مکر و فریب اور اپنے خفیہ ایجنٹوں کے ذریعے حکومت وامارت کو ہتھیایا۔ ملک کو انگریز کے دامِ فریب سے آزاد کرانے میں اولین کردار قائدینِ جنگِ آزادی ۱۸۵۷ء کا کردار نمایاں ہے ۔ جن کی اکثریت علما و مشائخ پر مشتمل تھی ۔ جن کی قیادت علامہ فضل حق خیرآبادی رحمۃ اللہ علیہ ، مولانا احمد اللہ شاہ مدراسی و شاہِ دہلی بہادر شاہ ظفر علیہما الرحمہ فرما رہے تھے ۔ بعد کے دور میں جن علما نے انگریز کی مخالفت میں اہم کردار ادا کیا ان میں ایک ممتاز نام اعلٰی حضرت امام احمد رضا رحمۃ اللہ علیہ کا ہے ۔ آپ کی بہت سی کتابیں اور فتاویٰ کے ذریعے انگریز سے نفرت کا اظہار ہوتا ہے ۔ آپ رحمۃ اللہ علیہ نے انگریزی تہذیب و تمدن ، خیالات اور غیر اسلامی سائنسی افکار کی تردید فرمائی ۔

مولانا یٰسن اختر مصباحی صاحب لکھتے ہیں : مغربی تہذیب و تمدن، فرنگی فکر و مزاج اور غاصب انگریزوں سے نفرت و عداوت کا یہ عالم تھا کہ نہ کبھی ان کی حکمرانی تسلیم کی اور نہ ہی ان کی کسی کچہری میں گئے اور وہ بھی یہ کہہ کر کہ ’’جب میں انگریز کی حکومت ہی تسلیم نہیں کرتا تو ان کی عدالت کیا تسلیم کروں گا؟‘‘ لفافہ پر ہمیشہ اُلٹا ٹکٹ لگاتے اور کہتے کہ ’’میں نے جارج پنجم کاسر نیچا کر دیا‘‘ زندگی بھر کسی انگریز کے پاس نہیں گئے اور نہ ان سے کوئی ربط وتعلق رکھا ۔ (امام احمد رضا اور جدید افکار و تحریکات، یٰسٓ اختر مصباحی،ص۱۸۱)

پروفیسر ابرار حسین (علامہ اقبال اوپن یونی ورسٹی اسلام آباد) پروفیسر ڈاکٹر محمد مسعود احمد نقشبندی کے نام ایک مکتوب (محررہ ۵؍نومبر۱۹۸۰ء) میں تحریر فرماتے ہیں : کل ایک طالب علم نے اعلٰی حضرت رحمۃ اللہ علیہ کے خط کا عکس بھیجا ہے، اعلٰی حضرت رحمۃ اللہ علیہ کے پتے تحریر کرنے کا انداز بڑا دل چسپ ہے اور سیاسی نظریات کی ترجمانی کرتا ہے، پتا تحریر کرتے ہوئے آپ نے - ملکہ کا سر نیچے رکھا ہے - یعنی اُلٹی طرف سے شروع کیا ہے ۔ پروفیسر محمد مسعود احمد رحمۃ اللہ علیہ کی کتاب ’’گناہ بے گناہی‘‘ میں اعلیٰ حضرت رحمۃ اللہ علیہ کے ایک مکتوب کا عکس شامل ہے، جس میں ملکہ برطانیہ کا ٹکٹ اُلٹا چسپاں ہے ۔ (گناہ بے گناہی ، پروفیسر ڈاکٹر محمد مسعود احمد،ص۳۲۔۳۳)

انگریز نے فکر و نظر کے اعتبار سے بھی مسلمانوں کو تباہ کرنے کی کوششیں کیں ۔ اعلٰی حضرت رحمۃ اللہ علیہ نے جہاں اسلامی روایات کو زندہ کیا وہیں تہذیبی و تمدنی لحاظ سے مسلم تشخص کے لیے کام کیا۔ آپ نے ہر پہلو سے انگریز کی فریب کاریوں کی مخالفت کی ۔ ہاں ! یہ ضرور ہے کہ آپ رحمۃ اللہ علیہ نے شعار و مراسمِ شرکیہ کی بھی مذمت کی ۔ اور انگریز کے ساتھ مشرکین ھنود سے بھی مسلمانوں کو باخبر کیا ۔

مذمتِ انگریز میں افاداتِ رضویہ

(1) انگریز کے عقیدۂ تثلیث سے متعلق اعلٰی حضرت فرماتے ہیں : نصارٰی بہ اعتبار حقیقتِ لغویہ……بلا شبہہ مشرکین ہیں کہ وہ بالقطع قائل بہ تثلیث و بُنّوت ہیں ۔ (اعلام الاعلام بان ہندوستان دارالاسلام،امام احمد رضا،ص۹،چشتی)

(2) اعلٰی حضرت رحمۃ اللہ علیہ انگریزی کورٹ سے رجوع کو بھی مسلمانوں کے حق میں ناروا و نقصان دہ جانتے تھے، اسی لیے فرماتے ہیں : اولاً : باستثناان معدود (چند)باتوں کے جن میں حکومت کی دست اندازی (مداخلت) ہو؛ اپنے تمام معاملات اپنے ہاتھ میں لیتے؛ اپنے سب مقدمات اپنے آپ فیصل کرتے، یہ کروروں روپے جو اسٹامپ و وکالت میں گھسے جاتے ہیں گھر کے گھر تباہ ہو گئے اور ہوئے جاتے ہیں محفوظ رہتے ۔ (تدبیر فلاح و نجات واصلاح،امام احمد رضارحمۃ اللہ علیہ ،صفحہ نمبر ۱۲)

(3) مغربی مصنوعات کے مقابل مسلمانوں کی صنعت و حرفت و تجارت کے قیام کے لیے عملی ترغیب دیتے ہوئے فرماتے ہیں : ثانیاً: اپنی قوم کے سوا کسی سے کچھ نہ خریدتے کہ گھر کا نفع گھر ہی میں رہتا۔ اپنی حرفت و تجارت کو ترقی دیتے کہ کسی چیز میں کسی دوسری قوم کے محتاج نہ رہتے، یہ نہ ہوتا کہ یورپ و امریکا والے چھٹانک بھر تانبا کچھ صناعی کی گڑھت کر کے گھڑی وغیرہ نام رکھ کر آپ کو دے جائیں اور اس کے بدلے پاؤ بھر چاندی آپ سے لے جائیں ۔ (تدبیر فلاح و نجات واصلاح،ص۱۲،چشتی)

(4) اعلٰی حضرت رحمۃ اللہ علیہ نے سفرِجبل پور۱۹۱۹ء کے موقع پر بعد نمازِ عصر گن گیرج فیکٹری کی طرف سے انگریز کو جاتے دیکھ کر یہ جملہ ارشادفرمایا *’’کم بخت(یعنی انگریز)بالکل بندر ہیں۔(اکرام امام احمد رضا، مولانا برہان الحق جبل پوری، مطبوعہ لاہور،ص۹۱)۔انگریز سے ایسی نفرت کہ ’’بندر‘‘کہہ کر اس کی ذلت فرما رہے ہیں۔

(5) انگریز کی مخالفت کی غرض سے انگریزی زبان سیکھنے کو باعثِ اجر قرار دیتے ہوئے فرماتے ہیں : ذی علم مسلمان اگر بہ نیت ردِ نصارٰی انگریزی پڑھے اجرپائے گا ۔ (فتاویٰ رضویہ جلد دہم اول، ص۹۹)

اعلٰی حضرت امام احمد رضا رحمۃ اللہ علیہ ، کافروں، مشرکوں، انگریزوں، یہودیوں، آتش پرستوں، قادیانیوں غرض کہ ہر باطل فرقے کو اسلام اور مسلمانوں کا دُشمن سمجھتے تھے۔ انتقال سے صرف ایک ماہ قبل ۲۵؍؍ محرم الحرام ۱۳۴۰ھ کو انھوں نے جو شعر ارشاد فرمایاوہ ان کے سیاسی افکار کا آئینہ دار ہے، سُنیے وہ کیا فرماتے ہیں :

کافر، ہر فرد و فرقہ دُشمن ما را

مرتد، مشرک، یہود و گبر و ترسا

ترجمہ: کافر بلکہ ہر فرد و فرقہ ہمارا دُشمن ہے، خواہ وہ مرتد ہو یا مشرک، یہودی ہو یا عیسائی (انگریز) اور یا آتش پرست ۔

(گناہ بے گناہی،پروفیسر ڈاکٹر محمد مسعود احمد، ص۶۸)

جو لوگ تحریکِ ترکِ موالات میں عدمِ شرکت کی شرعی وجہ کو غلط رنگ دیتے ہیں انھیں اعلٰی حضرت رحمۃ اللہ علیہ کے اس فیصلے پر غور کرنا چاہیے : موالات ہر کافر سے مطلقاً حرام ہے ۔ (فتاویٰ رضویہ، امام احمد رضا،جلد ششم، ص۱۲)

در حقیقت اعلٰی حضرت رحمۃ اللہ علیہ چاہتے تھے کہ مسلمان انگریز کے ساتھ ہی اس کے تمدن سے بھی نفرت کریں ۔ اسلامی اعتبار سے زندگی بسر کریں ۔ دشمن کا دشمن دوست ہوتا ہے ؛ اس لیے ہنود مسلمان کے دشمن تھے اور انگریز کے دوست۔ انگریز نے بعد کے دور میں مشرکین کا ساتھ دیا جس کا نتیجہ ہے کہ مسلم مقدس مقامات کو متنازعہ بنانے کی جرأت کی جاتی ہے ، مسلم کش فسادات کروائے جاتے ہیں ، مشرکین مسلمانوں سے زیادتی کرتے ہیں ۔ اسلامی تہذیب و شعار کی مخالفت کرتے ہیں ۔ اعلٰی حضرت رحمۃ اللہ علیہ کی بصیرت نے مستقبل کے احوال کی طرف نشان دہی کر دی تھی۔ہم خود مسلم مخالفت کے نظائر مشاہدہ کر رہے ہیں جو انگریز کی سازش کا حالیہ نتیجہ قرار دیے جا سکتے ہیں ۔ (طالب دعا و دعا گو ڈاکٹر فیض احمد چشتی)