یکم مئی مزدور ڈے اور ﻣﺤﻨﺖ ﻭ ﻣﺰﺩﻭﺭﯼ ﮐﮯ ﻓﻀﺎﺋﻞ
ﺍﺣﺎﺩﯾﺚ ﻣﺒﺎﺭﮐﮧ ﻣﯿﮟ ﻣﺤﻨﺖ ﻣﺰﺩﻭﺭﯼ ﮐﮯ ﺟﻮ ﻓﻮﺍﺋﺪ ﺍﻭﺭ ﺑﻨﺪﮦ ﻣﺰﺩﻭﺭ ﮐﮯ ﺟﻮ ﻓﻀﺎﺋﻞ ﺑﯿﺎﻥ ﮐﺌﮯ ﮔﺌﮯ ﮨﯿﮟ - ﺁﯾﺌﮯ ﺍﻥ ﮐﺎ ﻣﻄﺎﻟﻌﮧ ﮐﺮﺗﮯ ﮨﯿﮟ : ﺍﻥ ﺍﻟﻠﻪ ﻳﺤﺐ ﺍﻟﻌﺒﺪ ﺍﻟﻤﺤﺘﺮﻑ ۔ (ﻣﺴﻨﺪ ﺍﺣﻤﺪ بن حنبل)
ترجمہ : ﺑﮯ ﺷﮏ ﺍﻟﻠﮧ ﮨﻨﺮﻣﻨﺪ ﺑﻨﺪﮮ ﺳﮯ ﺑﮍﯼ ﮨﯽ ﻣﺤﺒﺖ ﻓﺮﻣﺎﺗﺎ ﮨﮯ ۔
ﺍﻥ ﺍﻟﻠﻪ ﻳﺤﺐ ﺍﻥ ﻳﺮﯼ ﻋﺒﺪﻩ ﺗﻌﺒﺎ ﻓﯽ ﻃﻠﺐ ﺍﻟﺤﻼﻝ ۔ (ﮐﻨﺰﺍﻟﻌﻤﺎﻝ ﺝ 4، ﺹ4)
ترجمہ : ﺑﮯ ﺷﮏ ﺍﻟﻠﮧ ﭘﺴﻨﺪ ﻓﺮﻣﺎﺗﺎ ﮨﮯ ﮐﮧ ﺍﭘﻨﮯ ﺑﻨﺪﮮ ﮐﻮ ﺣﻼﻝ ﺭﻭﺯﯼ ﮐﯽ ﺗﻼﺵ ﻣﯿﮟ ﺗﮭﮑﺎ ﮨﻮﺍ ﺩﯾﮑﮭﮯ
ام المنین ﺣﻀﺮﺕ ﻋﺎﺋﺸﮧ صدیقہ رضی اللہ عنہا ﻓﺮﻣﺎﺗﯽ ﮨﯿﮟ : ﺣﻀﻮﺭ ﺻﻠﯽ ﺍﻟﻠﮧ ﻋﻠﯿﮧ ﻭﺁﻟﮧ ﻭﺳﻠﻢ ﻧﮯ ﻓﺮﻣﺎﯾﺎ : ﺟﺲ ﺷﺨﺺ ﻧﮯ ﺍﺱ ﺣﺎﻝ ﻣﯿﮟ شﺎﻡ ﮐﯽ ﮐﮧ ﻭﮦ ﺗﮭﮏ ﮐﺮ ﭼﻮﺭ ﮨﻮﭼﮑﺎ ﺗﮭﺎ ﺗﻮ ﯾﻮﮞ ﺳﻤﺠﮭﻮ ﮔﻮﯾﺎ ﺍﺱ ﻧﮯ ﺍﺱ ﺣﺎﻝ ﻣﯿﮟ ﺷﺎﻡ ﮐﯽ ﮐﮧ ﺍﺱ ﮐﮯ ﺗﻤﺎﻡ ﮔﻨﺎﮦ ﻣﻌﺎﻑ ﮨﻮﭼﮑﮯ ﮨﯿﮟ ۔ (المعجم الکبیر ﻃﺒﺮﺍﻧﯽ)
ﻣﻦ ﮐﺪ ﻋﻠﯽ ﻋﻴﺎﻟﻪ ﮐﺎﻥ ﮐﺎﻟﻤﺠﺎﻫﺪ ﻓﯽ ﺳﺒﻴﻞ ﺍﻟﻠﻪ ۔ (مسند ﺍﺣﻤﺪ بن حنبل)
ترجمہ : ﺟﻮ ﺍﭘﻨﮯ ﺍﮨﻞ ﻭ ﻋﯿﺎﻝ ﮐﮯ ﻟﺌﮯ ﻣﺤﻨﺖ ﻭ ﻣﺸﻘﺖ ﮐﺮﺗﺎ ﮨﮯ ﻭﮦ ﮔﻮﯾﺎ ﺍﻟﻠﮧ ﮐﮯ ﺭﺍﺳﺘﮯ ﻣﯿﮟ ﺟﮩﺎﺩ ﮐﺮﻧﮯ ﻭﺍﻻ ﮨﮯ ۔
ﻣﻦ ﻃﻠﺐ ﺍﻟﺪﻧﻴﺎ ﺣﻼﻻً ﺍﺳﺘﻌﻔﺎﻓﺎ ﻋﻦ ﺍﻟﻤﺴﺌﺎﻟﺔ ﻭﺳﻌﻴﺎ ﻋﻠﯽ ﺍﻫﻠﻪ ‘ ﻭ ﺗﻌﻄﻔﺎ ﻋﻠﯽ ﺟﺎﺭﻩ ﻟﻘﯽ ﺍﷲ ﻭ ﻭ ﺟﻪ ﮐﺎﻟﻘﻤﺮ ﻟﻴﻠﺔ ﺍﻟﺒﺪﺭ ۔
ترجمہ : ﺟﺲ ﻧﮯ ﺣﻼ ﻝ ﺭﺍﮦ ﺳﮯ ﺩﻧﯿﺎ ﻃﻠﺐ ﮐﯽ ﺗﺎﮐﮧ ﺩﻭﺳﺮﻭﮞ ﮐﮯ ﺳﺎﻣﻨﮯ ﮨﺎﺗﮫ ﭘﮭﯿﻼﻧﮯ ﺳﮯ ﺑﭻ ﺳﮑﮯ ﺍﻭﺭ ﺍﭘﻨﮯ ﺍﮨﻞ ﻭﻋﯿﺎﻝ ﮐﻮ ﮐﻤﺎ ﮐﺮ ﮐﮭﻼ ﺳﮑﮯ ﺍﻭﺭ ﺍﭘﻨﮯ ﭘﮍﻭﺳﯽ ﮐﯽ ﺑﮭﯽ ﻣﺪﺩ ﮐﺮ ﺳﮑﮯ ۔ ﻭﮦ ﺍﻟﻠﮧ ﮐﮯ ﺣﻀﻮﺭ ﺍﺱ ﺷﺎﻥ ﺳﮯ ﺁﺋﮯ ﮔﺎ ﮐﮧ ﺍﺱ ﮐﺎ ﭼﮩﺮﮦ ﭼﻮﺩﮬﻮﯾﮟ ﮐﮯ ﭼﺎﻧﺪ ﮐﯽ ﻃﺮﺡ ﺭﻭﺷﻦ ﮨﻮﮔﺎ ۔ (ﻣﺼﻨﻒ ﺍﺑﻦ ﺍﺑﯽ ﺷﻴﺒﺔ، ﺝ4، ﺹ467)
ﺍﻥ ﺍﻃﻴﺐ ﻣﺎ ﺍﮐﻠﺘﻢ ﻣﻦ ﮐﺴﺒﮑﻢ . ترجمہ : ﺟﻮ ﺗﻢ ﺧﻮﺩ ﮐﻤﺎ ﮐﺮ ﮐﮭﺎﺗﮯ ﮨﻮ ﻭﮦ ﭘﺎﮐﯿﺰﮦ ﺗﺮﯾﻦ ﺭﺯﻕ ﮨﻮﺗﺎ ﮨﮯ ۔ (ﺳﻨﻦ ﺍﺑﻦ ﻣﺎﺟﺔ، ﺝ2، ﺹ768)
ﺍﻥ ﺍﺣﺎﺩﯾﺚ ﻣﺒﺎﺭﮐﮧ ﻣﯿﮟ ﺍﻧﺴﺎﻥ ﮐﻮ ﻭﺍﺿﺢ ﺍﺭﺷﺎﺩﺍﺕ ﮐﮯ ﺫﺭﯾﻌﮯ ﺍﺱ ﺣﻘﯿﻘﺖ ﺳﮯ ﺁﮔﺎﮦ ﮐﺮ ﺩﯾﺎ ﮔﯿﺎ ﮨﮯ ﮐﮧ ﻣﺤﻨﺖ ﻭ ﻣﺰﺩﻭﺭﯼ ﮐﺮﻧﮯ ﻭﺍﻻ ﮨﻨﺮﻣﻨﺪ ﺷﺨﺺ ﺍﻟﻠﮧ ﮐﺎ ﻣﺤﺒﻮﺏ ﮨﻮﺗﺎ ﮨﮯ- ﺍﺱ ﻟﺌﮯ ﻭﮦ ﺑﺎﻋﺚ ﺗﮑﺮﯾﻢ ﮨﮯ ‘ ﻣﺤﻨﺖ ﻭ ﻣﺸﻘﺖ ﮐﮯ ﺳﺒﺐ ﺟﻮ ﺍﺱ ﮐﮯ ﭼﮩﺮﮮ ﺍﻭﺭ ﺑﺪﻥ ﮐﯽ ﺭﻧﮕﺖ ﺑﺪﻝ ﺟﺎﺗﯽ ﮨﮯ ﺍﻭﺭ ﻭﮦ ﺩﮬﻮﭖ ﺳﮯ ﺟﮭﻠﺲ ﺟﺎﺗﺎ ﮨﮯ ﺗﻮ ﺍﺱ ﮐﯽ ﯾﮧ ﻗﺮﺑﺎﻧﯽ ﺭﺍﺋﯿﮕﺎﮞ ﻧﮩﯿﮟ ﺟﺎﺋﮯ ﮔﯽ ﺑﻠﮑﮧ ﻗﯿﺎﻣﺖ ﮐﮯ ﺭﻭﺯ ﺍﺱ ﮐﮯ ﺑﺪﻟﮯ ﻣﯿﮟ ﺍﺳﮯ ﻭﮦ ﺣﺴﻦ ﻭ ﺟﻤﺎﻝ ﻋﻄﺎ ﮐﯿﺎ ﺟﺎﺋﮯ ﮔﺎ ﮐﮧ ﭼﻮﺩﮬﻮﯾﮟ ﮐﺎ ﭼﺎﻧﺪ ﺑﮭﯽ ﺷﺮﻣﺎﺋﮯ ﮔﺎ ۔
ﺍﻟﻠﮧ ﮐﮯ ﮨﺎﮞ ﻣﺤﻨﺖ ﻭ ﻣﺸﻘﺖ ﮐﯽ ﺣﻼﻝ ﮐﻤﺎﺋﯽ ﮐﻮ ﺟﻮ ﻓﻀﯿﻠﺖ ﺣﺎﺻﻞ ﮨﮯ ﺍﺱ ﮐﺎ ﺍﻧﺪﺍﺯ ﮦ ﺍﺱ ﺑﺎﺕ ﺳﮯ ﻟﮕﺎﯾﺎ ﺟﺎﺳﮑﺘﺎ ﮨﮯ ﮐﮧ ﺍﻟﻠﮧ ﺗﻌﺎﻟﯽٰ ﻧﮯ ﺍﻧﺒﯿﺎﺀ ﮐﺮﺍﻡ ﮐﻮ ﺑﮭﯽ ﮐﺴﺐ ﮐﮯ ﺫﺭﯾﻌﮯ ﮐﮭﺎﻧﮯ ﮐﺎ ﺣﮑﻢ ﺩﯾﺎ ۔
ﯾﮩﯽ ﻭﺟﮧ ﮨﮯ ﮐﮧ ﯾﮧ ﺣﻀﺮﺍﺕ ﮨﻨﺮﻣﻨﺪ ﺑﮭﯽ ﺗﮭﮯ ﺍﻭﺭ ﻓﺮﺍﺋﺾ ﻧﺒﻮﺕ ﺍﺩﺍ ﮐﺮﻧﮯ ﮐﮯ ﺳﺎﺗﮫ ﺳﺎﺗﮫ ﻣﺤﻨﺖ ﮐﺮ ﮐﮯ ﺭﻭﺯﯼ ﺑﮭﯽ ﮐﻤﺎﺗﮯ ﺗﮭﮯ ۔ ﺟﯿﺴﺎ ﮐﮧ ﺣﻀﺮﺕ ﺁﺩﻡ ﻋﻠﯿﮧ ﺍﻟﺴﻼﻡ ﮐﮭﯿﺘﻮﮞ ﻣﯿﮟ ﮨﻞ ﭼﻼﺗﮯ ﺗﮭﮯ ، ﺟﻨﺎﺏ ﺍﺩﺭﯾﺲ ﻋﻠﯿﮧ ﺍﻟﺴﻼﻡ ﺩﺭﺯﯼ کا کام فرماتے ، ﺟﻨﺎﺏ ﻧﻮﺡ ﻋﻠﯿﮧ ﺍﻟﺴﻼﻡ ﺍﻭﺭ ﺣﻀﺮﺕ ﺯﮐﺮﯾﺎ ﻋﻠﯿﮧ ﺍﻟﺴﻼﻡ ﺗﺮﮐﮭﺎﻥ کا کام فرماتے ، ﺟﻨﺎﺏ ﻟﻮﻁ ﻋﻠﯿﮧ ﺍﻟﺴﻼﻡ ﮐﺎﺷﺘﮑﺎﺭ ﺗﮭﮯ ، ﺟﻨﺎﺏ ﺷﻌﯿﺐ ﻋﻠﯿﮧ ﺍﻟﺴﻼﻡ ﻧﮯ ﺭﯾﻮﮌ ﭘﺎﻟﮯ ﮨﻮﺋﮯ ﺗﮭﮯ ، ﺟﻨﺎﺏ ﻣﻮﺳﯽٰ ﻋﻠﯿﮧ ﺍﻟﺴﻼﻡ ﺍﭘﻨﯽ ﺑﮑﺮﯾﺎﮞ ﺁﭖ ﭼﺮﺍﺗﮯ ﺭﮨﮯ ، ﺟﻨﺎﺏ ﺩﺍﺅﺩ ﻋﻠﯿﮧ ﺍﻟﺴﻼﻡ ﺯﺭﮦ ﺳﺎﺯ ﺗﮭﮯ ﺟﺒﮑﮧ ﺣﻀﻮﺭ ﺻﻠﯽ ﺍﻟﻠﮧ ﻋﻠﯿﮧ ﻭﺁﻟﮧ ﻭﺳﻠﻢ ﻧﮯ ﺑﮭﯽ ﺍﺑﺘﺪﺍﺋﯽ ﻋﻤﺮ ﻣﯿﮟ ﺑﮑﺮﯾﺎﮞ ﭼﺮﺍﺋﯿﮟ ﺍﻭﺭ ﭘﮭﺮ ﮐﺎﻓﯽ ﻋﺮﺻﮧ ﺗﺠﺎﺭﺕ ﻓﺮﻣﺎﺗﮯ ﺭﮨﮯ ،
ﮨﻨﺮ ﻣﻨﺪ ﺍﻭﺭ ﺩﺳﺘﮑﺎﺭ ﮨﻮﻧﺎ ﮐﺴﯽ ﺑﮭﯽ ﺍﻋﺘﺒﺎﺭ ﺳﮯ ﻣﻌﯿﻮﺏ ﻧﮩﯿﮟ ﺍﻭﺭ ﻧﮧ ﮨﯽ ﯾﮧ ﺩﻧﯿﺎ ﺩﺍﺭﯼ ﮨﮯ
ﭼﻮﻧﮑﮧ ﺣﻼﻝ ﮐﻤﺎﺋﯽ ﮐﺎ ﺣﮑﻢ ﺍﻟﻠﮧ ﭘﺎﮎ ﻧﮯ ﺩﯾﺎ ﮨﮯ ﺍﻭﺭ ﮨﻨﺮ ﻣﻨﺪ ﻣﺤﻨﺘﯽ ﺍﻧﺴﺎﻥ ﺣﻼﻝ ﮐﯽ ﮐﻤﺎﺋﯽ ﮐﯿﻠﺌﮯ ﺗﮓ ﻭ ﺩﻭ ﮐﺮﺗﺎ ﮨﮯ ﺍﺱ ﻟﺌﮯ ﺧﻠﻮﺹ ﻧﯿﺖ ﺳﮯ ﻣﺤﻨﺖ ﮐﺮﻧﮯ ﻭﺍﻟﮯ ﺷﺨﺺ ﮐﻮ ﭼﻮﺩﮬﻮﯾﮟ ﮐﮯ ﭼﺎﻧﺪ ﮐﯽ ﻃﺮﺡ ﺧﻮﺑﺼﻮﺭﺕ ﺑﻨﺎ ﺩﯾﺎ ﺟﺎﺋﮯ ﮔﺎ ۔
ﺣﻀﺮﺕ ﮐﻌﺐ رضی اللہ عنہ ﺭﻭﺍﯾﺖ فرماﺗﮯ ﮨﯿﮟ : ﮨﻢ ﺍﭘﻨﮯ ﺁﻗﺎ ﻭ ﻣﻮﻟﯽٰ ﺻﻠﯽ ﺍﻟﻠﮧ ﻋﻠﯿﮧ ﻭﺁﻟﮧ ﻭﺳﻠﻢ ﮐﮯ ﮨﻤﺮﺍﮦ ﺻﺒﺢ ﺳﻮﯾﺮﮮ ﺑﯿﭩﮭﮯ ﮨﻮﺋﮯ ﺗﮭﮯ ﮐﮧ ﺍﭼﺎﻧﮏ ﺍﯾﮏ ﺻﺤﺖ ﻣﻨﺪ ﺑﮍﮮ ﮨﯽ ﺧﻮﺑﺼﻮﺭﺕ ﻧﻮﺟﻮﺍﻥ ﮐﻮ ﺩﯾﮑﮭﺎ ﺟﻮ ﻧﻮﺭ ﮐﮯ ﺗﮍﮐﮯ ﻣﺤﻨﺖ ﻭ ﻣﺸﻘﺖ ﮐﯿﻠﺌﮯ ﺁﮔﯿﺎ ﺗﮭﺎ ۔ ﮨﻢ ﻧﮯ ﺍﺱ ﮐﯽ ﺍﺱ ﻣﺤﻨﺖ ﻭ ﻣﺸﻘﺖ ﮐﻮ ﺩﻧﯿﺎ ﻭﯼ ﺣﺮﺹ ﺍﻭﺭ ﻻﻟﭻ ﭘﺮﻣﺤﻤﻮﻝ ﮐﯿﺎ ﺍﻭﺭ ﮐﮩﺎ ﮐﮧ ﺍﮔﺮ ﯾﮧ ﺷﺨﺺ ﺍﻟﻠﮧ ﮐﮯ ﺭﺍﺳﺘﮯ ﻣﯿﮟ ﻧﮑﻠﺘﺎ ﺗﻮ ﮐﺘﻨﺎ ﺍﭼﮭﺎ ﺗﮭﺎ ، ﺍﺏ ﺍﺱ ﮐﯽ ﺳﺎﺭﯼ ﺗﮓ ﻭ ﺩﻭ ﮐﺎ ﻣﺤﻮﺭ ﺻﺮﻑ ﺩﻧﯿﺎ ﮨﮯ ۔ ﺍِﺱ ﭘﺮ ﺣﻀﻮﺭ ﺻﻠﯽ ﺍﻟﻠﮧ ﻋﻠﯿﮧ ﻭﺁﻟﮧ ﻭﺳﻠﻢ ﻧﮯ ﻓﺮﻣﺎﯾﺎ:ﺍﯾﺴﺎﻧﮧ ﮐﮩﻮ ۔ ﺍﮔﺮ ﯾﮧ ﻧﻮﺟﻮﺍﻥ ﺍﺱ ﻟﺌﮯ ﻣﺤﻨﺖ ﮐﺮ ﺭﮨﺎ ﮨﮯ ﺗﺎﮐﮧ ﺍﺳﮯ ﺩﻭﺳﺮﻭﮞ ﮐﮯ ﺁﮔﮯ ﮨﺎﺗﮫ ﻧﮧ ﭘﮭﯿﻼ ﻧﺎ ﭘﮍﮮ ﺗﻮ ﺑﮭﯽ ﯾﮧ ﺍﻟﻠﮧ ﮐﮯ ﺭﺍﺳﺘﮯ ﻣﯿﮟ ﮨﮯ ﺍﻭﺭ ﺍﮔﺮ ﯾﮧ ﺿﻌﯿﻒ ﻣﺎﮞ ﺑﺎﭖ ﺍﻭﺭ ﺍﮨﻞ ﻭ ﻋﯿﺎﻝ ﮐﮯ ﻟﺌﮯ ﮐﻮﺷﺶ ﮐﺮ ﺭﮨﺎ ﮨﮯ ﺗﻮ ﺑﮭﯽ ﯾﮧ ﺍﻟﻠﮧ ﮐﮯ ﺭﺍﺳﺘﮯ ﻣﯿﮟ ﮨﮯ ۔ ﺍﻟﺒﺘﮧ ﺍﮔﺮ ﯾﮧ ﺩﻭﮌ ﺩﮬﻮﭖ ﺍﺱ ﻟﺌﮯ ﮨﮯ ﺗﺎﮐﮧ ﺩﻭﻟﺖ ﺟﻤﻊ ﮐﺮﮮ ﺍﻭﺭ ﺩﻭﺳﺮﻭﮞ ﭘﺮ ﺑﮍﺍﺋﯽ ﺟﺘﺎﺋﮯ ﺗﻮ ﺷﯿﻄﺎﻥ ﮐﮯ ﺭﺍﺳﺘﮯ ﻣﯿﮟ ﮨﮯ ۔ﺣﻀﺮﺕ ﮐﻌﺐ ﺑﻦ ﻋﺠﺮﮦ ﺳﮯ ﻣﺮﻭﯼ ﻣﻨﺪﺭﺟﮧ ﺑﺎﻻ ﻭﺍﻗﻌﮧ ﺳﮯ ﺑﮭﯽ ﭘﺘﮧ ﭼﻠﺘﺎ ﮨﮯ ﮐﮧ ﺍﭘﻨﮯ ﻣﺎﮞ ﺑﺎﭖ ﺍﻭﺭ ﺍﮨﻞ ﻭ ﻋﯿﺎﻝ ﮐﯿﻠﺌﮯ ﻣﺤﻨﺖ ﻣﺰﺩﻭﺭﯼ ﮐﺮﻧﮯ ﻭﺍﻻ ﺷﺨﺺ ﺭﺍﮦ ﮨﺪﺍﯾﺖ ﭘﺮ ﮔﺎﻣﺰﻥ ﮨﻮﺗﺎ ﮨﮯ ۔ اللہ ہم سب کو محنت مزدوری ، حق حلال کی کمائی عطاء فرمائے آمین ثم آمین ۔(طالب دعا و دعا گو ڈاکٹر فیض احمد چشتی)
No comments:
Post a Comment