قبولِ اسلام سے پہلے کے اعمال اور موجودہ دور کے فتنے باز

قبولِ اسلام سے پہلے کے اعمال اور موجودہ دور کے فتنے باز

محترم قارئینِ کرام : آج کل بعض بدبخت و بدنسل خبیث الفطرت لوگ صحابہ کرام رضی اللہ عنہم کی اسلام سے پہلے کی زندگی کے اعمال و افعال کو لے کر صحابہ کرام رضی اللہ عنہم کی توہین کر رہے ہیں فقیر چشتی نے مختصر وقت میں مناسب سمجھا کہ ان بد بختوں کو جواب بھی دیا جائے اور عامۃ المسلمین کو بھی آگاہ کیا جائے کہ جو شخص کفر و شرک چھوڑ کر اسلام قبول کر لے تو اس کے حالتِ کفر میں سرزد ہونے والے تمام گناہ معاف کر دیے جاتے ہیں ۔ اسلام سے پہلے جو بھی گناہ ہیں وہ اسلام قبول کرنے کے بعد معاف ہو جاتے ہیں اور اسلام انہیں ختم کر دیتا ہے ۔ جب اللہ عزوجل اور اس کے رسول صلی اللہ علیہ وآلہ وسلم نے اسلام قبول کرنے سے پہلے کے اعمال معاف کر دیے تو موجود دور کے تنقید کرنے والے بدبخت کیا خود کو اللہ عزوجل اور نبی کریم صلی اللہ علیہ وآلہ وسلم سے بڑا سمجھتے ہیں ؟ ۔ اے اہلِ اسلام اِن فتنہ بازوں اور اسلام کے لبادے میں چھپے اسلام دشمنوں کو پہچانو اور اِن ملحدین کے شر سے خود کو اور اپنی نسلوں کو بچاٶ ۔ تفصیل درج ذیل ہے : ⏬

امام یحییٰ بن شرف نووی رحمۃ اللہ علیہ شرح صحیح مسلم میں لکھتے ہیں : قرآنِ مجید اور احادیثِ صحیحہ سے ثابت ہے کہ جو شخص مسلمان ہو گیا اس کے زمانۂ کفر کے تمام گناہ معاف کر دیے جاتے ہیں ۔ (شرح صحيح مسلم نووی جلد نمبر 2 صفحہ نمبر 136)

اس کی وضاحت اس حدیث مبارکہ سے بھی ہوتی ہے کہ نبی کریم صلی اللہ علیہ وآلہ وسلم نے حضرت عمرو بن العاص رضی اللہ عنہ سے فرمایا : اے عمرو! کیا تم نہیں جانتے کہ اسلام پچھلے تمام گناہ مٹا دیتا ہے؟ ۔ (مسلم، الصحيح، کتاب الإيمان، باب کون الاسلام يهدم ما قبله، 1 : 112، رقم : 121،چشتی)

حضرت عبد ﷲ بن عباس رضی اللہ عنہما بیان کرتے ہیں کہ مشرکین میں سے بعض لوگ کثرت سے بدکاری و شراب نوشی اور دیگر کبیرہ گناہوں میں ملوث تھے ۔ وہ رسول اللہ صلی اللہ علیہ وآلہ وسلم کی خدمت میں حاضر ہوئے اور کہنے لگے : آپ ہمیں جس دین کی دعوت دیتے ہیں وہ بہترین دین ہے لیکن کیا اسلام قبول کرنے سے ہمارے (سابقہ) گناہوں کا کفارہ ہو جائے گا ؟ اس موقع پر یہ آیت نازل ہوئی : قُلْ یٰعِبَادِیَ الَّذِیْنَ اَسْرَفُوْا عَلٰۤى اَنْفُسِهِمْ لَا تَقْنَطُوْا مِنْ رَّحْمَةِ اللّٰهِؕ-اِنَّ اللّٰهَ یَغْفِرُ الذُّنُوْبَ جَمِیْعًاؕ-اِنَّهٗ هُوَ الْغَفُوْرُ الرَّحِیْمُ ۔ (سورہ الزمر ایت نمبر 53)

ترجمہ : تم فرماؤ اے میرے وہ بندو جنہوں نے اپنی جانوں پر زیادتی کی اللہ کی رحمت سے نااُمید نہ ہو بیشک اللہ سب گناہ بخش دیتا ہے بیشک وہی بخشنے والا مہربان ہے ۔

اس آیت میں اللہ تعالیٰ نے بندوں پر اپنی کامل رحمت ، فضل اور احسان کا بیان فرمایا ہے ، چنانچہ ارشاد فرمایا کہ اے حبیب ! صَلَّی اللہ تَعَالٰی عَلَیْہِ وَاٰلِہٖ وَسَلَّمَ ، آپ فرما دیں کہ اللہ تعالیٰ ارشاد فرماتا ہے’’ اے میرے وہ بندو ! جنہوں نے کفر اور گناہوں میں مبتلا ہو کر اپنی جانوں پر زیادتی کی ، تم اللہ تعالیٰ کی رحمت سے مایوس نہ ہونا اور یہ خیال نہ کرناکہ ایمان قبو ل کر لینے کے بعد سابقہ کفر و شرک پر تمہارا مُؤاخذہ ہو گا ، بیشک اللہ تعالیٰ اُس کے سب گناہ بخش دیتا ہے جو اپنے کفر سے باز آئے اور اپنے گناہوں سے سچی توبہ کر لے ،بیشک وہی گناہوں پر پردہ ڈال کربخشنے والا اور مصیبتوں کو دور کر کے مہربانی فرمانے والا ہے ۔ (تفسیرکبیر، الزّمر،تحت الآیۃ:۵۳، ۹/۴۶۳-۴۶۴، جلالین مع جمل، الزّمر، تحت الآیۃ: ۵۳، ۶/۴۳۹-۴۴۰، مدارک، الزّمر، تحت الآیۃ: ۵۳، ص۱۰۴۳)

اس آیت کے شانِ نزول کے بارے میں متعدد روایات ہیں ، ان میں سے ایک یہ ہے ،حضرت عبد اللہ بن عباس رَضِیَ اللہ تَعَالٰی عَنْہُمَا فرماتے ہیں ’’مشرکوں کے کچھ آدمیوں نے بارہا قتل و زِنا کا اِرتکاب کیا تھا ، یہ لوگ نبی کریم صَلَّی اللہ تَعَالٰی عَلَیْہِ وَاٰلِہٖ وَسَلَّمَ کی بارگاہ میں حاضر ہوئے اور کہنے لگے کہ جو کچھ آپ فرماتے ہیں وہ باتیں تو بہت اچھی ہیں لیکن ہمیں یہ تو معلوم ہو جائے کہ کیا ہمارے اتنے سارے گناہوں کا کفارہ ہو سکتا ہے ؟ اس پر یہ آیت نازل ہوئی : وَ الَّذِیْنَ لَا یَدْعُوْنَ مَعَ اللّٰهِ اِلٰهًا اٰخَرَ وَ لَا یَقْتُلُوْنَ النَّفْسَ الَّتِیْ حَرَّمَ اللّٰهُ اِلَّا بِالْحَقِّ وَ لَا یَزْنُوْنَ ۔ (سورہ فرقان آیت نمبر ۶۸)

ترجمہ : اور وہ جو اللہ کے ساتھ کسی دوسرے معبود کو نہیں پوجتے اور اس جان کو جس کی اللہ نے حرمت رکھی ناحق نہیں مارتے اور بدکاری نہیں کرتے اور جو یہ کام کرے وہ سزا پائے گا ۔

اور یہ آیت نازل ہوئی : قُلْ یٰعِبَادِیَ الَّذِیْنَ اَسْرَفُوْا عَلٰۤى اَنْفُسِهِمْ لَا تَقْنَطُوْا مِنْ رَّحْمَةِ اللّٰهِ ۔

ترجمہ : تم فرماؤ اے میرے وہ بندو جنہوں نے اپنی جانوں پر زیادتی کی اللہ کی رحمت سے نااُمید نہ ہو ۔ (صحیح بخاری کتاب التفسیر باب یا عبادی الذین اسرفوا علی انفسہم ۔ الخ جلد ۳ صفحہ ۳۱۴ حدیث نمبر ۴۸۱۰،چشتی)

مذکورہ حدیث میں صراحت کے ساتھ قبولِ اسلام سے پہلے کیے گئے برے اعمال کی معافی کا ذکر ملتا ہے ۔ اسی طرح ایک حدیث شریف حالتِ کفر میں کیے گئے نیک اعمال کی وضاحت یوں کرتی ہے : حضرت حکیم بن حزام رضی اللہ عنہ بیان کرتے ہیں کہ انہوں نے نبی کریم صلی اللہ علیہ وآلہ وسلم کی بارگاہ میں عرض کیا : کیا مجھے ان نیکیوں پر اجر ملے گا جو میں نے زمانۂ جاہلیت میں کی تھیں ؟ رسول اللہ صلی اللہ علیہ وآلہ وسلم نے فرمایا : زمانہ جاہلیت میں جن نیکیوں کی تم نے عادت ڈالی تھی، وہ عادت اسلام میں بھی باقی رہے گی ۔ (صحيح مسلم کتاب الايمان، باب بيان حکم عمل الکافر إذا أسلم بعده جلد 1 صفحہ 113 رقم : 123)

ایک اور حدیث شریف میں ہے کہ حضرت حکیم بن حزام رضی اللہ عنہ کے اسی سوال پر نبی کریم صلی اللہ علیہ وآلہ وسلم نے فرمایا : سابقہ نیکیوں ہی کی بدولت تم کو اسلام قبول کرنے کی توفیق نصیب ہوئی ہے ۔ (صحيح بخاری کتاب الزکة باب من تصدق فی الشرک ثم اسلم جلد 2 صفحہ 521 رقم : 1369،چشتی)(صحيح مسلم کتاب الايمان باب بيان حکم عمل الکافر اذا أسلم بعده جلد 1 صفحہ 114 رقم : 123)

حَدَّثَنَا إِسْحَاق بْنُ إِبْرَاهِيمَ ، وَعَبْدُ بْنُ حميد ، قَالَا: أَخْبَرَنَا عَبْدُ الرَّزَّاقِ ، أَخْبَرَنَا مَعْمَرٌ ، عَنِ الزُّهْرِيِّ بِهَذَا الإِسْنَادِ. ح وحَدَّثَنَا إِسْحَاق بْنُ إِبْرَاهِيمَ ، أَخْبَرَنَا أَبُو مُعَاوِيَةَ ، حَدَّثَنَا هِشَامُ بْنُ عُرْوَةَ ، عَنْ أَبِيهِ ، عَنْ حَكِيمِ بْنِ حِزَامٍ ، قَالَ: قُلْتُ: يَا رَسُولَ اللَّهِ، أَشْيَاءَ كُنْتُ أَفْعَلُهَا فِي الْجَاهِلِيَّةِ، قَالَ هِشَامٌ: يَعْنِي أَتَبَرَّرُ بِهَا، فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: " أَسْلَمْتَ عَلَى مَا أَسْلَفْتَ لَكَ مِنَ الْخَيْرِ "، قُلْتُ: فَوَاللَّهِ لَا أَدَعُ شَيْئًا صَنَعْتُهُ فِي الْجَاهِلِيَّةِ إِلَّا فَعَلْتُ فِي الإِسْلَامِ مِثْلَهُ ۔ (صحيح مسلم كِتَاب الْإِيمَانِ باب بَيَانِ حُكْمِ عَمَلِ الْكَافِرِ إِذَا أَسْلَمَ بَعْدَهُ حدیث نمبر: 325)

ترجمہ : ابن شہاب زہری کے ایک اور شاگرد معمر نے اسی (سابقہ (سند کے ساتھ یہی روایت بیان کی ، نیز (ایک دوسری سند کے ساتھ) ابو معاویہ نے ہمیں خبر دی : ہمیں ہشام بن عروہ نے اپنے والد سے حدیث سنائی ، انہوں نے حضرت حکیم بن حزام رضی اللہ عنہ سےروایت کی ، انہون نے کہا کہ میں نے نبی کریم صلی اللہ علیہ وآلہ وسلم سے پوچھا : وہ (بھلائی کی) چیزیں (کام) جو میں جاہلیت کے دور میں کیا کرتا تھا ؟ (ہشام نے کہا : ان کی مراد تھی کہ میں نیکی کےلیے کرتا تھا) تو نبی کریم صلی اللہ علیہ وسلم نے فرمایا : تم اس بھلائی سمیت اسلام میں داخل ہوئے جو تم نے پہلے کی ۔ میں نےکہا : اللہ کی قسم ! میں نے جو (نیک) کام جاہلیت میں کیے تھے ، ان میں سے کوئی عمل نہیں چھوڑوں گا مگر اس جیسے کام اسلام میں بھی کروں گا ۔

عَنْ حَكِيمِ بْنِ حِزَامٍ رَضِيَ اللَّهُ عَنْهُ , قَالَ:" قُلْتُ يَا رَسُولَ اللَّهِ، أَرَأَيْتَ أَشْيَاءَ كُنْتُ أَتَحَنَّثُ بِهَا فِي الْجَاهِلِيَّةِ مِنْ صَدَقَةٍ أَوْ عَتَاقَةٍ وَصِلَةِ رَحِمٍ، فَهَلْ فِيهَا مِنْ أَجْرٍ؟ فَقَالَ النَّبِيُّ صَلَّى اللَّهُ عَلَيْهِ وَسَلَّمَ: أَسْلَمْتَ عَلَى مَا سَلَفَ مِنْ خَيْرٍ ۔

ترجمہ : حکیم بن حزام رضی اللہ عنہ نے بیان کیا کہ میں نے عرض کیا یا رسول اللہ صلی اللہ علیہ وآلہ وسلم ان نیک کاموں سے متعلق آپ کیا فرماتے ہیں جنہیں میں جاہلیت کے زمانہ میں صدقہ ، غلام آزاد کرنے اور صلہ رحمی کی صورت میں کیا کرتا تھا ۔ کیا ان کا مجھے ثواب ملے گا ؟ نبی کریم صلی اللہ علیہ وآلہ وسلم نے فرمایا کہ تم اپنی ان تمام نیکیوں کے ساتھ اسلام لائے ہو جو پہلے گزر چکی ہیں ۔ (صحيح البخاری كِتَاب الزَّكَاة حدیث نمبر 1436،چشتی)

حضرت سیدنا حکیم بن حزام رضی اللہ عنہ بیان کرتے ہیں : میں نے عرض کی : یا رسول اللہ صلی اللہ علیہ وآلہ وسلم میں نے زمانۂ جاہلیت میں چالیس غلام آزاد کئے تھے ۔ نبی کریم صلی اللہ علیہ وآلہ وسلم نے مجھ سے فرمایا : تم نے پہلے جو نیکیاں کی تھیں اسی وجہ سے تم نے اسلام قبول کیا ہے ۔ )مسند الحمیدی حدیث نمبر 564)

حضرت ابوسعید خدری رضی اللہ عنہ سے روایت ہے کہ نبی کریم صلی اللہ علیہ وآلہ وسلم نے فرمایا جب کوئی بندہ مسلمان ہو جائے پس اچھی طرح مسلمان ہو تو اللہ اس کا ہر ایک گناہ اتار دے گا جو وہ (اسلام سے پہلے) کر چکا تھا اور اس کے بعد حساب شروع ہوگا ایک نیکی کے بدل ویسی دس نیکیوں سے سات سو نیکیوں تک (لکھی جائیں گی) اور برائی کے بدل ویسی ہی ایک برائی (لکھی جائے گی) مگر جب اللہ اس کو معاف کردے ۔ (صحیح بخاری جلد 1 کتاب الایمان حدیث نمبر 31)

حضرت حکیم بن حزام رضی اللہ عنہ سے روایت ہے انہوں نے کہا میں نے عرض کیا یارسول اللہ صلی اللہ علیہ وآلہ وسلم ! بتلائیے کفر کے زمانے میں جو میں نے نیکیاں کی ہیں جیسے خیرات کرنا ، غلام آزاد کرنا ، ناطے والوں سے سلوک کرنا ، کیا ان کا ثواب مجھے ملے گا ؟ آپ صلی اللہ علیہ وآلہ وسلم نے فرمایا تُوجتنے نیک کام کر چکا ہے ، ان کو قائم رکھ کر مسلمان ہوا ۔ (صحیح بخاری جلد 1 کتاب الزکوۃ حدیث نمبر 1353،چشتی)

حضرت عبد اللہ بن مسعود رضی اللہ عنہ سے روایت ہے بعض صحابہ کرام رضی اللہ عنھم نے نبی کریم صلی اللہ علیہ وآلہ وسلم سے عرض کیا اے اللہ کے نبی صلی اللہ علیہ وآلہ وسلم کیا ہم سے ان کاموں کا مواخذہ ہوگا جو دور جاہلیت میں ہم نے کیے ہیں ؟ نبی کریم صلی اللہ علیہ وآلہ وسلم نے فرمایا جس نے اسلام لانے کے بعد نیک عمل کیے اس سے جاہلیت کے کاموں کا مواخذہ نہ ہوگا اور جو اسلام لانے کے بعد بداعمالیوں میں مشغول رہا اس سے (جاہلیت کے کاموں کا) مواخذہ ہوگا ۔ (صحیح مسلم کتاب الایمان)

حضرت عمرو بن عاص رضی اللہ عنہ کی ہے، ان کا بیان ہے کہ : لَمَّا جَعَلَ اللّٰہُ الإِسْلاَمَ فِیْ قَلْبِیْ، أَتَیْتُ النَّبِیَّ صَلَّی اللّٰہُ عَلَیْہِ وَسَلَّمَ فَقُلْتُ: أُبْسُطْ یَمِیْنَکَ فَلأُبَایِعَکَ، فَبَسَطَ یَمِیْنَہٗ فَقَبَضْتُ یَدَیَّ، فَقَالَ: مَا لَکَ یَا عَمَرُو! قُلْتُ: أَرَدْتُّ أَنْ أَشْتَرِطَ قَالَ: تَشْتَرِطُ مَاذَا؟ قُلْتُ: أَنْ یُّغْفَرَ لِیْ قَالَ: أَمَا عَلِمْتَ یَا عَمَرُو أَنَّ الإِسْلاَمَ یَہْدِمُ مَا کَانَ قَبْلَہٗ، وَأَنَّ الْہِجْرَۃَ تَہْدِمُ مَا کَانَ قَبْلَہَا، وَأَنَّ الْحَجَّ یَہْدِمُ مَا کَانَ قَبْلَہٗ۔ (صحیح مسلم کتاب الایمان)

ترجمہ : جب اللہ نے میرے دل میں مشرف باسلام ہونے کا خیال ڈالا تو میں نبی کریم صلی اللہ علیہ وآلہ وسلم کی خدمت میں حاضر ہوا ، اور میں نے عرض کیا کہ اپنا ہاتھ بڑھائیے ؛ تاکہ میں آپ سے بیعت کروں ، نبی کریم صلی اللہ علیہ وآلہ وسلم نے اپنا داہنا ہاتھ آگے کر دیا ، لیکن میں نے اپنا ہاتھ کھینچ لیا ، نبی کریم صلی اللہ علیہ وآلہ وسلم نے فرمایا کہ تمہیں کیا ہوا کہ تم نے ہاتھ کھینچ لیا ؟ میں نے عرض کیا کہ میں ایک شرط لگانا چاہتا ہوں ، وہ یہ کہ میری خطائیں بخش دی جائیں ، نبی کریم صلی اللہ علیہ وآلہ وسلم نے فرمایا : اے عمرو! کیا تمہیں یہ معلوم نہیں ہے کہ اسلام قبول کرنا سابقہ سبھی گناہوں کو مٹادیتا ہے ، ہجرت بھی پہلے گناہوں کو ڈھادیتی ہے اور حج بھی ماضی کے گناہوں کو زائل کردیتا ہے ۔

اس حدیث میں اس کی صراحت کردی گئی ہے کہ اسلام سابقہ گناہوں کو مٹادیتا ہے؛ بلکہ اس کے بعض اعمال مثلاً ہجرت وحج کی بھی یہ تاثیر ہے ، یہ ملحوظ رہے کہ سابقہ گناہوں کا ازالہ اسلام اور ہجرت وحج سے اسی وقت ہوسکے گا جب کہ نیت صادق اور خالص ہو، نیز اسلام ودیگر اعمال سے حقوق اللہ معاف ہوتے ہیں ، حقوق العباد خصوصاً مالی حقوق اسی وقت معاف ہوتے ہیں ، جب حق داروں سے معاملہ صاف کرلیا جائے۔

محترم قارئینِ کرام : مذکورہ تمام دلائل سے یہ ثابت ہوتا ہے کہ جو شخص ظاہراً اور باطناً مسلمان ہو گیا اس کے زمانۂ کفر کے برے کاموں پر مواخذہ نہیں ہو گا اور سابقہ نیک کاموں کی بدولت وہ آئندہ زندگی میں بھی اچھے اعمال جاری رکھے گا ۔ (طالبِ دعا و دعا گو ڈاکٹر فیض احمد چشتی)